បន្លែបង្ការ និងសាច់សត្វដែលចិញ្ចឹមតាមធម្មជាតិ មិនជាមានវីតាមីន ជីវជាតិរ៉ែ ឬគុណប្រយោជន៍ដល់សុខភាព ជាងផលិតផលដែលដាំ និងចិញ្ចឹមដោយមានជំនួយពីជាតិគីមីទូទៅ នោះទេ។ ការសិក្សាថ្មីបានអះអាងថា បន្លែ សាច់ ដែលផលិតតាមបែបធម្មជាតិ គ្រាន់តែអាចជួយអ្នកទទួលទានឲ្យកាត់បន្ថយការប្រឈមនានា និងសម្លាប់សត្វល្អិត ព្រមទាំងពពួកបាក់តេរីប្រឆាំងអង់ទីប៊ីយូទិកតែប៉ុណ្ណោះ។
ក្រុមអ្នកស្រាវជ្រាវមកពីសាកលវិទ្យាល័យស្តេនហ្វត សហរដ្ឋអាមេរិក បានធ្វើការវិភាគលើការស្រាវជ្រាវ២០០ករណីកន្លងមក ដោយប្រៀបធៀបពីស្ថានភាពអ្នកញ៉ាំបន្លែសាច់សរីរាង្គ និងអ្នកបរិភោគបន្លែសាច់ចិញ្ចឹមទូទៅ។
វេជ្ជបណ្ឌិត ស្មីត ស្ពេងហ្គើរ បានរកឃើញថា អ្នកញ៉ាំបន្លែសរីរាង្គ និងអ្នកញ៉ាំបន្លែដាំធម្មតា មិនមានភាពខុសប្លែកគ្នាលើកម្រិតវីតាមីន និងជីវជាតិឡើយ។
ការ សិក្សាក៏បានកត់សម្គាល់ផងដែរថា ជាទូទៅ បន្លែ សាច់ មាន៣០ភាគរយផ្ទុកថ្នាំសម្លាប់សត្វល្អិត។ ចំណែកឯក្នុងចំណោមបន្លែ សាច់សរីរាង្គវិញ មាន១០ភាគរយនៅតែផ្ទុកថ្នាំសម្លាប់សត្វល្អិតដដែល។
ប៉ុន្តែ វេជ្ជបណ្ឌិត លូ ជិនសេង មកពីសាកលវិទ្យាល័យសុខាភិបាល ហាវើត បានជំរុញថា៖ «អាហារសរីរាង្គ នៅតែជាជម្រើសល្អចំពោះសុខភាព បើទោះវាមិនមានវីតាមីនពិសេសក្ដី»៕
ស្ថិតនៅចម្ងាយប្រមាណ ២០ គីឡូម៉ែត្រពីរមណីយដ្ឋានពិកនិកនៅផ្លូវជាតិលេខ ៤ បង្គោលគីឡូម៉ែត្រលេខ ១៣៥ ស្រុកកំពង់សិលា ខេត្ដព្រះសីហនុ ដែលមានសេវាកម្មផ្ទះស្នាក់បាំងហ្គាឡូ និងអាហារដ្ឋានបម្រើមុខម្ហូប និងបន្លែផ្លែឈើសរីរាង្គ ជាពិសេស កសិដ្ឋានបន្លែ ផ្លែឈើសរីរាង្គបៃតងខ្ចីនៅក្នុងបរិវេណជើងភ្នំដ៏ស្រស់ត្រកាល កសិដ្ឋានដ៏ធំល្វឹងល្វែង ជាមជ្ឈមណ្ឌលបណ្ដុះបណ្ដាលផលិតផលសរីរាង្គ (OTC) មានដំណាំជាង ៩០ មុខរំលេចជាទិដ្ឋភាពដ៏ស្រស់ត្រកាលគួរឲ្យចង់បរិភោគ និងគយគន់ឥតជិនណាយលើខ្នងភ្នំដ៏ស្ងប់សុខ។
ដើម្បីលើកកម្ពស់ការទទួលទានបន្លែផ្លែឈើសរីរាង្គក្នុងចំណោមប្រជាពលរដ្ឋកម្ពុជាដោយបានលើកពាក្យស្លោកមួយឃ្លាថា «ទីណា កន្លែងណា មិនបារម្ភចំពោះសុវត្ថិភាពចំណីអាហារ» ក្រុមហ៊ុនតន្ទ្រីបៃតង ដែលធ្វើការនាំចូលគ្រាប់ពូជបន្លែមានគុណភាពខ្ពស់ បានរៀបចំកម្មវិធីដំណើរកម្សាន្ដចុងសប្ដាហ៍ទៅកាន់កសិដ្ឋានស្ថិតនៅក្នុងភូមិនេសាទ ស្រុកស្រែអំបិល ខេត្ដកោះកុង និងភ្លក្សរសជាតិម្ហូបអាហារដែលប្រើបន្លែស្រស់ថ្មីៗគ្មានសារធាតុគីមី។
លោក ខេង ងួន ជានាយករងនៅ Bellevue Serviced Apartments ទីដែលភ្ញៀវត្រូវចេញដំណើរ បានឲ្យដឹងថា៖ «យើងមិនចង់បានប្រាក់អ្វីពីការនាំភ្ញៀវទៅទស្សនាកសិដ្ឋានសរីរាង្គនោះទេ។ យើងគ្រាន់តែចង់បង្ហាញពួកគេនូវអត្ថប្រយោជន៍នៃការបរិភោគបន្លែ និងផ្លែឈើគ្មានជាតិគីមីចំពោះសុខភាព។
លោកបានបន្ដថា នៅក្នុងកញ្ចប់ដំណើរកម្សាន្ដនោះ ភ្ញៀវនឹងចេញដំណើរពីម៉ោង ៦ ព្រឹកពី Bellevue Serviced Apartments ដែលស្ថិតនៅតាមផ្លូវមាត់ទន្លេត្រើយខាងកើត ចម្ងាយប្រមាណ ៥០០ ម៉ែត្រពីស្ពានជ្រោយចង្វារ ទៅទទួលទានអាហារពេលព្រឹកនៅរមណីយដ្ឋានពិកនិក វេលាម៉ោងប្រមាណ ៨ ឬ ៩ ព្រឹក រួចបន្ដដំណើរទៅកាន់កសិដ្ឋានទស្សនា ស្វែងយល់អំពីការដាំដំណាំព្រមទាំងភ្លក្សរសជាតិផលិតផលគ្មានជាតិគីមី។
មុនត្រឡប់មករាជធានីភ្នំពេញវិញ ភ្ញៀវត្រូវបានបម្រើអាហារថ្ងៃត្រង់ចម្អិនពីបន្លែសរីរាង្គស្រស់ៗដ៏ឆ្ងាញ់ពិសាមួយពេលទៀតនៅរមណីយដ្ឋានពិកនិក។
លោកបន្ថែមថា៖ «ក្នុងតម្លៃ ២៥ ដុល្លារសម្រាប់ភ្ញៀវម្នាក់ ពួកគេនឹងរីករាយជាមួយសកម្មភាពជាច្រើនទៀតទាំងនៅរមណីយដ្ឋានពិកនិក និងកសិដ្ឋានដំណាំ ព្រមទាំងអាចទិញបន្លែ ផ្លែឈើទាំងនោះយកទៅទទួលទានថែមទៀតផង។
អ្នកនាង ប៉ាង សុវណ្ណារ័ត្ន ជាមគ្គុទេ្ទសក៍ និងអ្នកគ្រប់គ្រងនៅកសិដ្ឋាន បានឲ្យដឹងថា នៅលើផ្ទៃដីដែលបង្កបង្កើនផលដំណាំជាង ៩០ ប្រភេទនេះ មានទាំងបន្លែទង បន្លែផ្លែ បន្លែស្លឹក បន្លែធាង បន្លែមើមហើយបន្លែផ្លែឈើ រមែងត្រូវបានដាំដុះផ្លាស់ប្ដូរវិលជុំគ្រប់រដូវកាលទាំងអស់។
អ្នកនាងបន្ដទៀតថា៖ «ថ្វីដ្បិតតែដំណាំទាំងអស់នេះ មានគ្រប់រដូវ និងត្រូវបានស្រោចស្រពទឹកជាប្រចាំយ៉ាងណាក៏ដោយ ក៏សម្រស់បៃតងនៃស្លឹករុក្ខជាតិដុះខ្ចីមីរដេរដាសដ៏ត្រកាលបំផុតនោះគឺនៅរដូវវស្សា»។
ចំពោះទីតាំងដំណាំនៅឆ្ងាយរហូតដល់តំបន់ភ្នំដែលដីមិនមានជីជាតិល្អនោះ អ្នកនាង ប៉ាង សុវណ្ណារ័ត្ន បានប្រាប់ពីមូលហេតុថា៖ «ការបង្កបង្កើនផលលើដីដែលធ្លាប់ប្រើសារធាតុគីមី បន្លែផ្លែឈើទាំងនោះមិនអាចចាត់ទុកជាផលិតផលសរីរាង្គឡើយ។ ដូច្នេះ បើទោះជាដីភ្នំគ្មានជីជាតិ ឬមានថ្មពិបាកយ៉ាងណា ក៏យើងខិតខំផលិតបន្លែ ផ្លែឈើសរីរាង្គពិតៗ៕
ConversionConversion EmoticonEmoticon